LAOAG CITY – Inadmitir ni Barangay Chairman Crisanto Coloma Jr. ti Barangay 7 iti ili ti San Nicolas nga inikkatna dagiti uppat a Barangay Health Workers iti nasao a barangay.
Nupay kasta, inlawlawagna nga awan ti pakainaiganna daytoy iti saan a panangsuportada kenkuana iti napalabas a Barangay and Sangguniang Kabataan Elections no diket gapu iti saan a panangtungpal kadagiti pammilinna kas Kapitan kadakuada.
Inbatadna nga inbaonna dagiti nasao a Barangay Health Workers a mapanda dalusan dagiti health equipment nga indonar ni Ilocos Norte 2nd District Rep. Angelo Marcos Barba ngem saanda a nagtungpal.
Inpalgakna a saan laeng daytoy ti umuna a gundaway a saan a sumursurot ken agtungtungpal kadagiti pammilinna dagiti nadakamat a Barangay Health Workers.
Gapu iti daytoy, kinasarita ni Kapitan Coloma Jr. dagiti maseknan nga uppat a Barangay Health Workers ken inpakaammona daytoy a banag kadagiti padana nga opisial ti barangay iti naisayangkat a session-da no sadinno nga immannugotda dagitoy nga ikkatenna dagiti nasao a Barangay Health Workers.
Innayonna a mamati daytoy nga husto ti inaramidna nga addang gapu ta maiyataday daytoy iti Republic Act No. 160 nga adda ti bileg ti maysa a Barangay Captain a mangikkat kadagiti Barangay Health Workers.
Naammoan a dagiti insukat ti Kapitan ket dagiti met laeng dati a nagserbi kas Barangay Health Workers.
Mainaig iti daytoy, basar kadagiti naikkat nga uppat a Barangay Health Workers ket adda ti katulaganda a tunggal aldaw ti Domingo ket awan ti ag-duty ken agdalus rason a saanda a sinurot ti inmadar ti Kapitan kadakuada.
Inpettengda a desidido dagitoy a mangipila ti reklamo kontra ken ni Kapitan Coloma Jr. iti Local Government Unit iti ili ti San Nicolas.
Kabayatanna, inlawlawag ni Atty. Gerald Gallardo, Provincial Director ti Department of the Interior and Local Government a ti nasao a linteg a dakdakamaten ni Kapitan Coloma Jr. ket naipasa pay laeng idi tawen 1990 no sadinno nga adda ti naipasa a baro a Magna Carta for Barangay Health Workers idi 2023 a mangibagbaga nga awan ti karbengan ti maysa a Kapitan ti barangay a mangikkat kadagiti Barangay Health Workers laketdi accredited ken registered dagitoy.
