LAOAG CITY – Inalaw ti Philippine Coast Guard (PCG) a nakabase iti Brgy. Victoria ili ti Currimao dagiti 4 a Filipino a crew ti ferry boat kalpasan a naarinebneb ti naglugan da iti nagbaetan ti Batanes Island ken Taiwan.
Daytoy ti kinumpirmaran ni Lt. Commander Alexander Corpuz ti PCG iti Ilocos Norte.
Immuna iti daytoy, inbatad ni PO1st Class Marlon Borromeo nga apaman a narescue ti Motor Vessel Formento 2 dagiti nadakamat a crew a nairana a dimmalyasat a barko a Motor Vessel Formento 2 ket nangiwayat da iti “distress call” iti District Northern Eastern Luzon ngem saan da a makapaglayag gapu kadagiti dadakkel a dalluyon rason nga inkamang da iti Coastguard District Northwestern Luzon rason nga iti Coastguard Currimao iti nangala kadagiti nasao a crew.
Nabigbig dagitoy a da Rene Fernandez, 58, residente iti 27F Basa St. Brgy Paltoc, Quezon City; Ryan Parungaw y Jose, 27, residente iti Brgy. Ayusan, Sta. Lucia, Ilocos Sur; Raymund Cotiangco y Delos Reyes, 33, residente iti Sta. Cruz, Giginto, Bulacan ken ni Arnold Espanola, 42, residente iti 62B University Ave. Potrero, Malabon City.
Agpapan ita ket saan pay a nasarakan iti kapitan ti barko a ni Charlemagne Tambago kalpasan a nagbati daytoy iti barko idi naglagto dagiti 4 a crew manipod iti barko apaman a maarinebneb ti nagluganan da.
Segun kenni Corpuz, naarinebneb ti nagluganan a ferry boat dagiti nadakamat a crew gapu kadagiti dadakkel a dalluyon baybay.
Naamoan a naggapo idiay Busan, South Korea ti nasao a ferry boat a nagkarga iti 2 a backhoe nga agturong idiay Cebu kalpasan na ket agturong da idiay Papua New Guinea.
Kunana a basar iti palawag dagiti nadakamat a crew ket 3 oras a nagtatapaw dagitoy iti baybay agingga a narescue dagitoy.
Iti agdama, addan iti natalged a kasasaad dagiti nasao a crew ken naiturn-over dan iti ahensya da.
