LAOAG CITY – Inpakaammo ni Police Lt. Col. Rafael Lero, hepe ti PNP Laoag, nga uppat a kapsula ken maysa a buli iti kalibre 45 a paltog ti narekobre dagiti otoridad.
Ti nasao a klase ti paltog ket inusar ti pimmusay a suspek a ni Ruel Adaon.
Ti narekobre a buli ti kalibre 45 ket naggapu met iti bullet proof ni Police Staff Sgt. Ver Suarez iti Provincial Drug Enforcement Unit.
Kuna ni Lero a naipan iti kustudyar ti PNP Laoag ti nasao a paltog idinto a naisuko met ti paltog ni Suarez ken ti paltog ti maysa kadagiti back-up a nakatama kenni Adaon.
Manamnama a maipadalan iti paraffin examination dagiti maseknan.
Innayon ni Lero nga adda ti sumagmamano a numero a napunas iti serial number ti paltog ni Adaon kalpasan bineripikar dagiti otoridad.
Maipalagip a nakaldaw ni Adaon a pulis ti katransaksiyon daytoy rason nga immasot iti paltog ken pinaputokan na ni Suarez a nakatamaan ti bukot daytoy.
Bimmales met ti back-up ni Suarez rason a natamaan met ti barukong ni Adaon a poon ti nakatayan daytoy kabayatan ti operasyon idi kalman iti Brgy. Balacad ditoy siudad ti Laoag.
