LAOAG CITY – Kinumpirmaran ti Department of Justice nga uppat a kaso ti naipila kontra ken ni Sarah Discaya iti Court of Tax Appeals (CTA) gapu iti tax evasion.
Inbatad ni Department of Justice spokesperson Atty. Polo Marrinez, ti tax evasion a sangsangoen ni Discaya ket panaglabsing iti Sections 254 (Willful Attempt to Evade or Defeat Taxes) ken 255 (Willful Failure to Supply Correct and Accurate Information) ti National Internal Revenue Code of 1997.
Sakupen daytoy dagiti taxable years a 2020 agingga iti 2021.
Kuna ni Martinez, naipila iti korte ti kaso idi Pebrero 3, iti Court of Tax Appeals kas addaan ti hurisdiksion iti nasao a kaso.
Kabayatanna, nangipila ti motion for reconsideration ni Curlee Discaya tapno itantan ti panangipasa ti impormasion.
Gapu iti daytoy, kidkiddawen ti Bureau of Internal Revenue a mangipaay ti komento kas paset ti proseso ken agtultuloy ti preliminary investigation basar kadagiti dokumento.
Inlawlawag ni Prosecutor General Richard Fadullon a manamnama a maresolbar ti Department of Justice ti isyu kadagiti sumarsaruno a lawas.
Idi Setiembre 2025, inbutaktak dagiti Discaya dagiti nagnagan dagiti sumagmamano a kongresista, dagiti staff-da, ken dagiti opisial ti Department of Public Works and Highways a maipagarup a karaman iti corruption scheme.
Ni Sarah Discaya ket agdama nga adda idiay Lapu-Lapu City Jail idinto a ni Curlee keyt adda iti Senate custody.
Idi Disiembre 2025, napilaan pay ni Sarah ken dadduma pay nga akusado ti Office of the Ombudsman mainaig iti maysa a P96.5-milyon a ghost flood control project idiay Davao Occidental.
Naglikudanna dagiti pammabasol ti graft ken malversation.
