LAOAG CITY – Natiliw dagiti 4 a lalaki babaen iti naiyuswat a drug buy bust operation nga inserbi dagiti kameng ti PNP- San Nicolas idiay Brgy. 14 San Gregorio iti nasao nga ili.
Nabigbig dagiti subject a da Paul Jansen Bartolome, maysa a gasoline boy, residente iti Brgy. 13 Laoag City; Johnley Antonio Agbunag, residente iti Brgy Ermita, Laoag City; John Reynon Mandac y. Mercado, agtawen ti 21, residente iti Brgy. Casili, Laoag City; ken Andy Azereth, agtawen ti 26, residente idiay Brgy. San Marcelino iti ili ti Dingras ngem agkaskasera iti Brgy. 14 San Gregorio iti ili ti San Nicolas.
Segun ti imbestigasyon ti PNP, naiwayat ti nasao nga operasyon iti mismo a kalsada a nagyanan dagiti subject a naglugan iti dua a motorsiklo.
Narekobre ti nagpammarang a police poseur buyer iti 1 a plastic sachet ti maipagarop a naglaon iti shabu, 1 a sachet ti maipagarop a naglaon iti marijuana a naikarga ti pagyanan iti candy, ken 300 a pisos a kuarta .
Iti agdama, nagtalinaed iti kustudyar ti PNP San Nicolas dagiti nasao a suspek ken maisagsaganan iti maipila a kaso kontra kadakuada.
