LAOAG CITY – Natiliw dagiti uppat nga indibidual gapu iti iligal a panagsusugal iti maysa a minatayan iti Brgy. 15, Visaya iti ili ti Vintar.
Nabigbig dagiti suspek nga isuda Jessie Pascual y Agcaoili, agtawen ti 53, awanan asawa, mannalon ken residente ti Brgy. 15 Visaya iti nasao nga ili, Marlou Viernes y Ancheta, agtawen ti 48, awanan asawa, construction worker ken residente ti Brgy. 10 Parparoroc, Joebert Martinez y Agron, agtawen ti 43, awanan asawa, tricycle driver ken residente ti Brgy. 15 Visaya ken Romel Magayano y Bunuan, agtawen ti 35, awanan asawa, tricycle driver ken residente ti Brgy. 4 Sta. Maria iti ili ti Vintar.
Segun ken ni Police Captain Roi Manuel Ordonio, ti Hepe iti Philippine National Police iti nadakamat nga ili, ballaigi a naarestar dagiti maseknan a suspek kalpasan a naaktuaranda nga agay-ayam dagitoy ti Lucky 9 iti maysa a minatayan iti nadakamat a lugar.
Gapu iti daytoy, kunana a nakumpiskarda ti 40 a pedaso ti playing cards, maysa a lamisaan, maysa a table cloth, uppat a monobloc chair, maysa a pinggan, maysa a pedaso ti one thousand peso bill, dua a pedaso ti five hundred peso bill, tallo a pedaso ti two hundred peso bill, 15 a pedaso ti one hundred peso bill, siam a pedaso ti fifty peso bill, 12 a pedaso ti twenty peso bill, 11 a pedaso ti five peso bill ken dua a pedaso ti one peso bill no sadino adda ti pakabuklan nga 4,847 a pisos ti nakumpiskar a pusta a kuarta.
Inlawlawagna nga adda dagiti barangay officials a nakaimatang iti pannakaisayangkat ti nasao nga operasion.
Kabayatanna, agtultuloy pay laeng ti maisaysayangkat nga imbestigasion babaen kadagiti otoridad maipapan iti nasao a banag.
