LAOAG CITY – Nadadael ti uppat a pagtaengan iti Barangay Caaoacan ditoy siudad ti Laoag iti idadalapos ti alipogpog iti uneg laeng ti sumagmamano a segundo.
Segun ken ni Mrs. Ponciana Andres, maysa kadagiti akinkukua kadagiti naperdi a balay, alisto a dimmalapos ti alipogpog no sadinno nga apaman a rimmuar daytoy iti pagtaenganda ket simmungad kenkuana dagiti naitayab a naisalapay nga aruatenda kas kadagiti uniporme.
Malaksid iti daytoy, kunana a gapu iti kinapigsa ti alipogpog ket naitayab pay ti galba iti balayda ken natukkol dagiti kayo nga adda iti arubayanda.
Mainaig iti daytoy, inbatad ni Dr. Melvin Manuel, mangidadaulo ti City Disaster Risk Reduction and Management Office ditoy siudad ti Laoag nga adda ti pito a pamilia ti naapektaran iti idadalapos ti alipogpog no sadinno a tallo a pagtaengan ti partially damaged ken maysa ti totally damaged.
Inlawlawagna a kabinnuligda ti Department of Social Welfare and Development, Ilocos Norte Electric Cooperative ken City Engineering Office para iti pannakatarimaan ken pannakaiyurnos dagiti naperdi a balay.
Inpasingkedna a maipaayan ti naan-anay a tulong dagiti naapektaran a pamilia manipud iti lokal a gobierno.
Innayonna nga awan ti naipadamag a nadangran iti napasamak nga idadalapos iti alipogpog.
Iti agdama, manarimaan pay laeng ti panangduktalda no mano ti balor iti pannakadadael dagiti uppat a pagtaengan.
Maipalagip nga adda manen ti dimmalapos nga alipogpog iti ili ti Paoay, Pasuquin ken ditoy siudad ti Laoag iti kallabes.
