LAOAG CITY – Sumango ti uppat a pulis iti dismissal proceedings kalpasan a nairaman kadagiti insidente ti indiscriminate firing iti panangsarabo ti baro a tawen basar iti Philippine National Police (PNP).
Inbatad ni Acting Philippine National Police Chief Police Lt. Gen. Jose Melencio C. Nartatez Jr. nga inbilinna ti naiget nga imbestigasion ken inpettengna a ti kastoy nga aramid ket seryoso a panaglabsing iti disiplina.
Basar iti Philippine National Police, ti uppat a pulis ket karaman iti 16 nga indibidual a nairaman iti insidente manipud idi Disiembre 16, 2025 agingga iti Enero 1, 2026.
Naammoan a tallo kadagiti pulis ket na-disarm ken nakabaluden idinto nga agtultuloy a birbiruken dagiti otoridad ti maysa a Patrolman idiay Cagayan de Oro.
Inpasigurado ti Philippine National Police a pagsungbaten dagiti amin a karaman, pulis man wenno sibilian iti agpada nga administratibo ken kriminal a wagas.
