LAOAG CITY – Natiliw ti maysa a lalaki iti naiyuswat a drug buy-bust operation babaen iti nagtitipon a pwersa ti PDEU, PDEA, City Drug Enforcement Unit ken Regional Drug Enforcement Unit iti paset ti By-pass road iti nagbedngan ti Barangay Sta. Maria ken Lapaz road ditoy ciudad ti Laoag.
Nabigbig ti subject ti operasyon a ni Arvin Adina, agtawen ti 41, naasawaaan ken residente iti Brgy. 1 iti ili ti San Nicolas.
Segun iti report, naglako ni Adina ti maysa a sachet a naglaon ti maipagarop a shabu nga agbalor ti sangaribo a pisos iti maysa a pulis a nagpammarang kas poseur-buyer.
Iti pannakakapkap ni Adina ket nakakumpiskar pay dagiti operatiba ti uppat a sachet a naglaon met laeng ti maipagarop a shabu.
Mainaig iti daytoy, inpetteng ni Adina nga awan ti inlaklako na a droga ken napan iti PNP-Laoag tapno mapan na koma kitaen ti motorsiklo ti kabsat na nga inusar ti immunan a natiliw iti maysa a lodging house.
Nupay kasta, saanna a nakita ti motorsiklo ti kabsat na isut gapuna nga agawid koman ken nagna laeng iti by-pass road gapu ta na-traffic iti Gilbert Bridge idi adda ti nangsangga iti dalan na a dagitoy ket dagiti otoridad.
Naamoan a daytoyen ti maikatlo a gundaway a natiliw ni Adina gapu iti panaglabsing iti Republic Act (RA) 9165 wenno ti Comprehensive Dangerous Drugs Act of 2002.
Ni Adina ket karaman iti Drug Watchlist iti Regional Level.
Iti agdama ket naipakustodyar pay laeng ni Adina iti PNP-Laoag ken maisagsaganan ti reklamo a maipila kontra kenkuana.
