LAOAG CITY – Nagballigi dagiti otoridad a nangtiliw iti maysa a lalaki iti inyuswat da a drug buy-bust operation iti Barangay 24, San Roque iti ili ti Sarrat.
Nabigbig ti subject ti operasyon a ni Mr. Julimar Galang y Fontanilla, agtawen ti 36, awanan ti asawan, taga Barangay Suyo ditoy ciudad ti Laoag ngem agdama nga agnanaed iti Barangay 24 iti ili ti Sarrat.
Naamoan a naiyuswat a mismo ti transaksyon iti kwarto ti suspek no sadinno nga iti panangiyawat na ti maysa a sachet a naglaon ti maipagarop a shabu iti nagpammarang a pulis poseur-buyer ket kinemmeg a dagusen dagiti otoridad ni Galang.
Nakumpiskar iti ikot ti suspek ti uppat a sachet a naglaon ti maipagarop a shabu ken ti sangaribo a pisos a nausar iti operasyon.
Ti suspek ket karaman iti Top 10 drug watchlist iti Region 1 ken daytoyen ti maikadwa a pannakatiliw na gapu iti illegal a droga.
Malaksid kadagiti uppat a sachet a naglaon ti maipagarop a shabu ket adda pay ti nakumpiskar dagiti otoridad a maysa a calibre 38 a paltog ken tallo a bala na, ken ti drug paraphernalia.
Basar pay kadagiti otoridad, manarimaan ti panagsususup ti suspek ti maipagarop a shabu kabayatan ti panangiyuswat da ti operasyon.
