LAOAG CITY – Umaboten iti uppat nga indibidual idinto a siyam a sabsabali dagiti nasugatan kalpasan a rimmaot ti maysa nga armado a lalaki iti maysa a simbaan idiay Michigan.
Nabigbig ti suspek a ni Thomas Jacob Sanford, agtawen ti 40 ken residente iti Burton, Michigan.
Basar iti report, kabayatan ti misa iti Church of Jesus Christ of Latter-day Saints iti Grand Blanc ket nagturong ti suspek iti lugar kalpasan na ket bigla lattan a nagpalto-paltog.
Malaksid iti daytoy, pinuuran pay ti suspek ti sumagmamano a paset ti pasdek
Nagballaag dagiti otoridad a possible nga adda pay dagiti marekobre da a biktima iti uneg ti pasdek.
Kinumpirmaran dagiti otoridad a napatay da ti suspek isut gapuna nga inpasigurado da nga awanen ti pangta iti publiko.
Mainaig iti daytoy, iti statement ti Church of Jesus Christ of Latter-day Saints, kinumpirmaran na nga adda dagiti kritikal ti kondisyon na kadagiti nasugatan a miembro da.
Naidanun met a dagus ken ni US President Donald Trump ti napasamak no sadinno nga inbilin na iti Federal Bureau of Investigation ti panangiyuswat da ti naan-anay nga imbestigasyon mainaig iti napasamak iti baet a pimmusayen ti suspek.
Kabayatanna, kinondenar ni Michigan Governor Gretchen Whitmer ti insidente ken inpetteng na a ti napasamak a kinadamsak iti mismo nga uneg ti simbaan ket saan a nakaaawat.
