LAOAG CITY – Maidasar ti uppat a saksi nga agtestigo iti pannakaituloy ti impeachment trial kontra ken ni Bise Presidente Sara Duterte inton Agosto 10, 11, ken 12, 2026.
Karaman kadagitoy ni Xylene May del Campo, supervising auditor manipud iti Commission on Audit–Intelligence and Confidential Funds Audit Office (COA-ICFAO) a nagtestigo met idi kalman, Mierkoles. Agtestigo daytoy mainaig iti Article I, a mangtalantan kadagiti maipagarup a di umiso a panagusar ken iregularidad iti pannakaikkat ti ₱612.5M a confidential funds ti Office of the Vice President (OVP) ken ti Department of Education (DepEd).
Karaman pay ditoy ni Marivic Pareja, ti mangidaulo wenno hepe ti House Archives. Daytoy ti mangidatag ken mangsertipikar kadagiti opisial a dokumento ken rekord nga iggem ti Kamara mainaig iti kaso.
Kasta met ni Gina Acosta, dati nga Special Disbursing Officer ti Office of the Vice President (OVP).Daytoy ti mangasikaso ken mangiruar kadagiti pondo babaen ti panangidaulo da VP Sara ken Edward Fajarda, dati nga Special Disbursing Officer ti Department of Education (DepEd). Isu ti akin responsibilidad iti gastos ken pannakaiwaras dagiti confidential funds ni Duterte idi isuna ket Secretary of Education pay laeng.
Mainaig iti dytoy, imbilin pay ti Trial Presiding Officer ti pannakaipaulog ti subpoena kadagiti nadakamat a saksi ti prosecution tapno tumabuno iti impeachment trial inton sumaruno a lawas.
Kabayatanna, maituloy to inton Lunes, Agosto 10, iti alas-10 ti bigat ti panangusig.
