LAOAG CITY – Inrakurak ti Korte Suprema a mangiwayatda metten ti flexible work arrangements kagiddan iti addang iti panaginot ti enerhia iti sibubukel nga hudikatura.
Daytoy ket kalpasan nga inparuk-at ni Chief Justice Alexander Gesmundo ti Memorandum Circular No. 02, Series of 2026.
Iti babaen daytoy, mangipatungpal ti Supreme Court (SC) ken Court of Appeals (CA) ti uppat nga aldaw nga on-site work ken maysa nga aldaw a work-from-home arrangement iti kada lawas.
Kabayatanna, agtalinaed iti lima nga aldaw nga on-site workweek ti Sandiganbayan ken Court of Tax Appeals (CTA).
Naikkan met ti bileg dagiti presiding judge kadagiti single-sala courts nga agpili ti aniaman kadagiti dua nga schedule:
On-site manipud Lunes agingga iti Huebes ken work from home tunggal Biernes;
On-site manipud Martes agingga iti Biernes ken work from home tunggal Lunes.
Gagem ti panagbalbaliw iti schedule ti serrek iti sangay ti hudikatura a makainot iti enerhia.
