LAOAG CITY – Immatras kadagiti alegasionda dagiti uppat a lallaki a miembro ti maipagarup nga ex-bodyguards ni dati nga Ako Bicol Party-list Representative Zaldy Co.
Iti baro a sinapataan a statement dagiti self-identified security guards ni Co, kinunada a saan pudno dagiti immun-una a statement-da nga adda pakainaigan ni Presidente Ferdinand Marcos Jr., dati a House Speaker ken Leyte 1st District Representative Martin Romualdez, Zaldy Co, ken dadduma pay a personalidad iti maipagarup a pannakaiwaras ti maleta a kuarta.
Segun kadakuada, pinirmaan da ti joint affidavit gapu iti kari a tulong pinansial ken seguridad para kadagiti pamiliada. Ngem ita, kunada a kayatda laeng ti agbiag a naulimek gapu kadagiti pangta iti biagda ken dagiti adu a kaso a sangsanguenda.
Tallo kadagiti uppat a lallaki ti nangibaga a dagiti immun-una nga affidavit-da ket naisubmitir iti Office of the Ombudsman a maar-aramat ita iti imbestigasion ni Romualdez ken dadduma pay.
Kinunada pay nga idi nagparangda iti Ombudsman, napilitanda a nagpirma iti affidavit ken impangtada a mapilaanda ti kaso no saanda a tungpalen.
Nupay kasta, kinuna dagiti “maleta boys” a boluntario nga inaramid ken nagpirmada kadagiti baro nga affidavit-da idi Kalman, Agosto 6.
Mainaig ti daytoy, kunada nga inkonsiderarda pay nga ibabawi dagiti dati a statement-da iti dua a bulan agingga a nagdesisionda nga agparang.
Malagip nga idi Pebrero 2026, 18 a lallaki ti nagpabigbig iti bagbagida a dati a security personnel ti Zaldy Co ti nangipila iti affidavit a mangibagbaga a nangipatulodda ti maleta a kuarta kada Presidente Marcos, Romualdez, Co, ken dadduma pay a personalidad.
