LAOAG CITY – Natay ti uppat nga indibidual kalpasan a napaltu-paltogan iti maysa a bar idiay Montana, United States of America.
Kinumpirmaran ti Montana Division of Criminal Investigation ti pammaltog a napasamak iti siudad ti Anaconda a dati a copper smelting hub nga addaan ti populasion nga agarup 10 a ribu a tattao iti abagatan a laud iti Montana.
Binigbig ti Anaconda-Deer Lodge County Law Enforcement Center ti suspek a ni Michael Paul Brown nga armado a simrek iti bar.
Binallaagan dagiti otoridad dagiti residente iti Anaconda nga agtalinaed iti pagtaenganda ken irikep dagiti ridaw dagitoy tapno maliklikan ti saan a napintas a mapasamak.
Basar iti post iti social media ti Granite County Sheriff’s Office nga asideg iti Anaconda, ti suspek ket nakabado ti tie dyed shirt, blue jeans ken orange bandana.
Kabayatanna, naiget ti pannakikoordinar ni Montana Governor Greg Gianforte kadagiti otoridad mainaig iti insidente.
