LAOAG CITY – Naitaray dagiti 4 a tattao kalpasan a nadesgrasya da iti Paoay-Balacad Road bisinidad ti Brgy. Nagbacalan iti ili a Paoay.
Nabigbig ti nangiturong ti Motorstar Motorcycle 125 a ni Marites Sacayanan, 19, gasoline girl, awanan lisensya ken dagiti inlubbon na a da Jessa Flores, 18, crew ti burger stand ken maysa a menor de edad ken agpapada a residente iti Brgy. 27 Mumulaan iti nasao nga ili.
Nabigbig met iti nanginturong ti Mio Yamaha 125 a ni Fraklin Bagasol, 54, naasawaan, construction worker, awanan lisensya ken ti asawa na a ni Rosalina Bagasol, 54, housewife ken agpada a residente iti Brgy. Suba iti nasao nga ili.
Basar iti imbestigasyon ti PNP Paoay, bayat a lasaten koma ti Mio Yamaha iti Paoay-Balacad Road manipod iti agpababa a barangay road ket dita a nagderderetso idinto a dumalyasat met nga agpaabagatan a direksyon ti Motorstar Motorcycle rason a nadungpar na.
Gapu iti dayta, nagsagaba iti sugat iti nagduduma a paset ti bagi ni Sacayanan idinto a nagsagaba ti dunor ti ulo ni Flores ken ti menor de edad.
Kabayatanna, nagsagaba laeng ti gasgas ti driver ti Mio idinto a nagsagaba ti dunor ti saka ti asawa na.
Naamoan nga adda iti impluwensya ti nasanger ti driver ti Mio.
