LAOAG CITY – Inbatad ni Doctor Alan Taylan a dakkel ti epekto na kadagiti pribado nga ospital ti panagkurkurang ti medical health care workers ditoy pagilyan.
Inlawlawag na a basar iti report ket 40 a porsiento kadagiti nurses iti intero a pagilyan ti nagresign idi Mayo 2022.
Kuna na nga ado pay ti pending ti aplikasyon na a nurses nga agkalikagom a mapan agtrabaho iti ballasiw taaw gapu iti pandemya a gubuay ti covid-19 virus.
Inpakaammo na a dagiti pending ti aplikasyon na a nurses ket nagaplikar da paylaeng idi sakbay a timmama ti pandemya.
Inpalgak na a no agtultuloy latta ti panagbaba bilang dagiti medical health workers ditoy pagilyan ket awan ti sabali a pagpilyan dagiti pribado nga ospital no saan a ti mangibasbassit ti awaten da a pasyente.
Innayon na a kastoy ti ar-aramiden da no sadinno a dagiti saanda a maakomodar a pasyente ket ipatulod da iti tertiary hospital kas iti Mariano Marcos Memorial Hospital and Medical Center iti ciudad ti Batac.
