LAOAG CITY – Target a mabakunaan kontra iti COVID-19 usar ti astrazeneca vaccine dagiti 40 a health care workers ken staff ti Municipal Health Office iti ili ti Pinili.
Daytoy ti inpakaammo ni Dr. Agnes Barlahan ti Municipal Health Officer ti nasao nga ili.
Segun kenkuana, malaksid pay kadagiti medical practitioners kas ti nurse, medical technologist, sanitary inspector, mid-wife ket karaman pay ditoy a matudukan ti bakuna dagiti ambulance driver, utility worker ken administrative aide iti opisina da.
Inlawlawag na a boluntaryo met amin dagiti maseknan nga agpabakuna.
Naammoan nga immunan a nabakunaan ti Municipal Health Officer ti Pinili itay kallabes iti Karmelli Clinic and Hospital ditoy ciudad ti Laoag.
