LAOAG CITY- Natay ti 40 a pallot a manok a kukwa ni Ronnie Abis iti Brgy. Balbuena, Pinili Ilocos Norte kalpasan nga maipagarop a nginatngat iti Aso.
Naipakaamo ken ni Abis ti napasamak babaen ti panagipulong ti maysa a obrero na.
Insigida nga nagpatulong iti otoridad ti maseknan ngem saan pay masinunuo ti akin taraken dagiti aso gapu ti kinalimitado ti impormasyon.
Segun ken ni Abis, maipagarop nga ginundawayan dagiti animal iti panagngatngat dagiti manok gapo ta awan ti nagbantay iti talon a nagpatnag.
Inlawlawag dagiti obrero a saan da nabantayan ti talon gapo ta napigsa ti tudo.
Basar ken ni SPO3 Maria Kristina San Juan ti PNP Pinili, 37 a manok iti inisyal a naireport ngem segun ken ni Abis, 40 ti manok ti natay.
Ita agdama, agultuloy pay laeng ti imbestigasyon nu sino ti rumbeng a mangsagot iti perwisyo nga inpaay ti insidente.
