LAOAG CITY – Saan nga inawat ti Romano Katolika idiay Kenya ti $40,000 a donasyon ni President William Ruto.
Daytoy ti inbatad ni Catholic Archbishop of Nairobi, Philip Anyolo.
Naamoan nga indiaya ni President Ruto ti donasyon tapno adda ti usaren ti simbaan a pagpatakder ti pasdek a pagnaedan dagiti padi kas regalo na iti choir kabayatan ti misa iti Soweto Catholic Church iti ciudad ti Nairobi a kabisera ti Kenya.
Ti donasyon ket indiaya ti presidente kalpasan nga adda ti rakurak dagiti Obispo a pinaksiat ti gobierno gapu iti pannakapaay da a nangipatungpal ti “electoral promises” da.
Malaksid iti daytoy, mapres-pressure pay dagiti simbaan manipod kadagiti anti-tax protesters a mangak-akusar kadakuada iti kinasinged da unay kadagiti pulitiko.
