LAOAG CITY – Inpakaammo ni Mrs. Vilma Bagay, ti Principal II iti San Nicolas Elementary School a dumanon iti nasurok-kumurang 500 a delegates manipod idiay Candon City, Ilocos Sur ti temporario nga agtalinaed iti pagadalanda para iti Region 1 Athletic Association Meet.
Segun kenkuana, ti nasao a bilang ket pakairamanan dagiti atleta, coaches ken technical officials.
Inbatadna nga adda ti 41 a klasrum ti insaganada a pagtarusan dagiti delegates no sadino adda pay ti manamnama nga umab-abot iti 30 nga indibidual ti sumaruno pay a sumangpet.
Inlawlawagna a nangrugi a simmangpet dagiti maseknan a participants ket idi malem ti Abril 19 banag nga isu metten ti pormal a panangrugida nga agaprehistro kadakuada.
Mainaig iti daytoy, inpasigurado ni Mrs. Bagay nga amin a banag a masapol dagiti delegates ket nakasagana ken nakaplastar tapno agbalin met laeng a komportable dagitoy bayat ti kaaddada ditoy probinsia.
Immuna iti daytoy, kunana a nangisayangkatda ti contingency plan tapno mapakadaan a naimbag ti pannakaipatungpal ti Region 1 Athletic Association Meet babaen iti panagtitinnulong dagiti mangisursuro ken estudiante iti nasao a pagadalan.
