LAOAG CITY – Umabot iti 41 a migrants ti natay kalpasan a nadadael ken naarinebneb ti nagluganan da a bangka iti isla ti Lampedusa idiay Italya.
Basar iti report, adda laeng ti uppat a migrants a nakalasat iti insidente.
Inpakaammo dagiti uppat a nakalasat nga 45 da amin a nagluganan iti bangka, pakairamanan ti tallo nga ubbing.
Naamoan a dagiti migrants ket aggapo iti Sfax idiay Tunisia ngem nadadael ti nagluganan da a bangka kabayatan ti panagturong da iti Italya.
Maipalagip nga umaboten iti nasurok a 1,800 a tattao ti natay gapu iti pannakaarinebneb ti nagluganan da a bangka iti ibaballasiw da manipod iti North Africa agturong iti Europa.
