LAOG CITY – Naragsak ni Mr. Rodolfo Sugui iti ili ti Pinili gapo ta daytoyen ti maika-29 a daras ti panagidonar na ti dara.
Daytoy ket babaen iti blood letting activity a nagbinnuligan ti lokal a gobierno ti Pinili ken Bombo Radyo Laoag babaen iti tulong ti Red Cross-Ilocos Norte Chapter.
Segun kenni Sugui, tinawen nga agidon-donar ti dara kas wagas na iti panagyaman iti namarsua iti salun-at a maipaay kenkuana.
Inbatad na a no makaidonar ti dara ket marikna na a simmaranta ken sumalun-at isuna kalpasan ti 24 nga oras.
Kunana na awan ti marikrina na a saan a napintas iti bagi na gapo ta sursurten na amin dagiti banag wenno wagas tapno balligi a makaidonar ti dara.
Kabayatanna, umabot iti 41 ti balligi a nagidonar ti dara iti ili ti Pinili.
