LAOAG CITY – Nairekord ti 42 a baro a kaso ti COVID-19 ditoy probinsya rason nga agdagup iti 384 ti aktibo a kaso idi (Hunyo 8, 2021).
Manipud iti nasao a bilang nga inparuk-at ti gobyerno probinsyal, 12 ti baro a kaso ditoy siudad ti Laoag, innem iti ili ti Badoc, agpada a lima iti ili ti San Nicolas ken Bacarra, uppat iti Bangui, tallo iti siudad ti Batac, dua iti Vintar ken saggaysa iti Paoay, Sarrat, Pagudpud, Piddig ken Dingras.
Umaboten iti 2882 ti kaso ti COVID-19 ditoy probinsya idinto nga awan ti nagimbag a pasyente rason a nagtalinaed a 2458 ti recoveries.
Nagtalinaed pay nga 40 dagiti pimmusay.
Manipud idi Mayo 26 ita a tawen, nairekord ti 21 a kaso agingga idi Hunyo 7 no sadinno a nairekord ti 12 a kaso, ket idi laeng kalman ti kaaduan ti nairekord a kaso.
