LAOAG CITY – Nadeterminaren ti Commission on Election ditoy ciudad ti Laoag dagiti pagadalan nga agserbi kas polling precints iti umay nga election.
Daytoy ti inbatad ni Atty. Julius Balbas, ti Commission on Election officer ditoy ciudad.
Kunana nga adda ti pakabuklan nga 44 a pagadalan ti mausar intono eleksiyon a mangakomodar ti nasurok a 80 ribo a bontante manipod kadagiti 80 a barangay ditoy ciudad.
İnpakaammo na a karaman kadagitoy ket ti Laoag Central School a mangakomodar ti 7 a barangay ken Gabaldon Elementary School a mangakomodar ti 6 a baranangay.
Inbatad na pay a malaksid kadagiti nadakamat a pagadalan ket adda pay ti 116 a cluster precints a maestablisar.
Inpakaammo na nga uray nabigbigen dagitoy a pagbotosan ket manamnama ti panangpasyar ti ahensya kadagiti sumarsaruno nga aldaw tapno maipasigurado ti seguridad ken makitaripnong da kadagiti mangisursuro.
Innayon na a ditoy pay a makita no ania dagiti kasapolan a maipaay kadakuada tapno masigurado nga agbalin nga naannayas ti eleksyon ken maliklikan ti problema.
