LAOAG CITY – Inpaganetget ni P/Lt/Cl Jephree Taccad iti biang ti Provincial Operation Management Unit iti Ilocos Norte Police Provincial Office a naiget ti panagmonitorda kadagiti 45 nga aglaklako ti paputok ditoy probinsia.
Segun kenni Taccad, masapul a makiuman dagiti aglaklako iti Philippine National Police tapno masigurado a masurot ti kampania kontra iti panaglako iti paputok kadagiti menor de edad ken illegal a paputok.
Innayonna nga agtultuloy ti nainget a panagbantayda, pakairamanan dagiti mailaklako online.
Kabayatanna, awan pay ti nairekordda a nasugatan gapu iti paputok ditoy probinsia ita a tawen.
