LAOAG CITY – Naapektaran ti 45 nga indibidual iti Sitio Magum, Barangay Macambol, Mati City, Davao Oriental iti diarrhea outbreak.
Iti nasao a kaso, 39 ti nagimbagen idinto nga innem ti aktibo, dua ti naospital ken uppat iti adda iti home monitoring.
Binigbig ti City Epidemiology Surveillance and Response Unit (CESRU) ti acute watery diarrhea kas kangrunaan a kondision a mapapati a gapu iti kontaminado a danom.
Iti imbestigasion, naduktalan nga adda ti E. coli ken coliform bacteria kadagiti sumagmamano a pangal-alaan ti danom.
Ti Sitio Magum 2 ket isu ti kangatoan ti bilang ti kaso (29), ken kaaduan kadagiti naapektaran ket dagiti ubbing nga agtawen ti maysa agingga lima. Karaman kadagiti sintomas a naipadamag ket ti nabasa a rugit (98%), panagbaliw-baliw ti rugit (67%), panagsakit ti buksit (56%), panaggurigor (23%) ken panag-vomit (21%).
Naabisoan dagiti residente a liklikan ti agdama a sistema ti danom, agusar ti alternatibo a pangalaan ken ipaburek ti mainom a danom.
Plano ti City Health Office a papintasen ti pasilidad ti water treatment ken imprastraktura ti sanitasion kageddan ti panangipatungpal ti naig-iget nga addang para iti kinatalged ti mainom a danom.
