LAOAG CITY – Maysa a nalawa a wildfire ti napasamak iti rehion ti Aude iti abagatan ti France nga asideg iti border ti Spain a nangitunda iti pannakauram ti 4,500 nga ektaria ti kabanbantayan.
Basar iti fire brigade, adda ti sumurok 1,250 a bumbero ti naipatulod tapno sebseban ti dumakdakkel nga apoy.
Inbatad ni Colonel Alexandre Jouassard ti civil protection agency nga agtultuloy ti operasionda tapno makontrol ti uram.
Kinumpirmaran met ni French President Emmanuel Macron nga amin nga ahensia ti pagilian ket nakasagana tapno tumulong iti insidente.
Kabayatanna, inpakaammo ni Deputy Prefect Lucie Rosech ti Aude nga adda ti dua nga indibidual ti naipadamag a nasugatan no sadinno ti maysa kadagitoy ket adda iti nakaro a kasasaad.
