LAOAG CITY – Agarop kagudua wenno 47 a porsyento dagiti nataengan a Pilipino ti mamati a pumintas ti panagbiagda iti sumaruno a 12 a bolan,
Daytoy ket basar iti resulta ti naisayangkat a survey babaen ti Social Weather Stations (SWS).
Rimuar pay iti survey a 37 a porsyento ti nangibaga nga awan ti pagbaliwan ti sitwasyon ti panagbiag a idinto a 5 porsyento ti mamati nga ad-adda pay a kumara ti mapaspasaran da a kinarigat ken 11 a porsiento dagiti saan a simmungbat.
Basar iti Social Weather Stations, ti net personal optimism score ket kapada ti “excellent” +40 idi Abril 23 agingga iti 28, 2025, kalpasan ti “very high” +37 idi Marso 15 agingga iti 20, 2025 ken “very high” +38 idi Abril 11 agingga iti 15 ita a tawen.
Naipakita pay iti datos nga apagapaman a ngimmato ti optimismo iti Visayas ken Metro Manila, adda met panagbaba na iti Mindanao, ken nagtalinaed ti sitwasyon iti Balance Luzon.
Kangatoan ti net optimism kadagiti agtawen ti 18 agingga iti 24 nga adda iti “excellent” +54, sumaruno ti +51 kadagiti agtawen ti 25 agingga iti 34 idinto a bimmaba iti +33 kadagiti agtawen ti 55 agpangato.
Dakkel met ti nagngatoan iti score dagiti non-elementary graduates, manipod “high” +23 nagbalin nga “excellent” +44 ken nagtalinaed a nangato iti dadduma pay nga educational levels.
Inpalagip ti Social Weather Stations a namin-11 a daras a nagbalin a “negative” ti optimism score manipod 1984, karaman ti “historic low” a -19 idi Mayo 2020 iti kangitingitan ti COVID lockdowns.
