LAOAG CITY – Umabot iti 4,320 a Pantawid Pamilyang Pilipino Prograam beneficiaries ti nagturpos iti probinsiya idi tawen 2023.
Daytoy ti inpakaamo ni Ms. Rosevera Candy D. Soberano, Project Development Officer II ti Pantawid Pamilyang Pilipino Program wenno 4Ps Division.
Kunana a kaadwan kadagitoy ket nakapagturposen iti panagbasa dagiti annakda ken dagiti dadduma ket awan iti agbasbasa.
Inlawlawagna a ti maysa kadagiti kangrunaan a gagem ti 4Ps program malaksid iti panangtulongan kadagiti nagannak ken ubbing a maaddaan iti nasalun-at a pammagi ket iti panakaipangato ti bilang ti enrollment ken attendance rate dagiti ubbing iti Child Development Centers, Pre-school, Elementary, ken Secondary schools.
Inpettengna a no ti maysa a Pilipino ket kalikagumna nga agbalin kas benepisyaryo ti 4Ps kasapulan a sumurot kadagiti kondisyon kas ti panaka-enroll dagiti annakda nga agtawen ti tallo agingga 18 ken masapul a makumpleto da wenno addaan da ti saan a nababbaba ngem 85% a class attendance rate iti kada school year.
Inpettengna a no saan a mapagtalinaed daytoy a kondisyon ket maikkat da ken maibilang da a kas graduate.
Iti agdama ket addan 15,109 nga aktibo a benepisyaryo ti Pantawid Pamilyang Pilipino Program ditoy probinsiya.
