LAOAG CITY – Naisayangkat ti 4Ps Sagip-Buhay Blood Donation iti Laoag City General Hospital ditoy ciudad ti Laoag.
Daytoy ket gagem na a matulungan dagiti miembro ti Pantawid Pamilyang Pilipino Program ditoy ciudad ti Laoag.
Inlawlawag ni Miss Michelle Barroga Martin iti City Link ti 4Ps ditoy ciudad ti Laoag, napanunot da ti mangisayangkat iti nasao nga aktibidad gapu ta ado dagiti dumaldalan ti dialysis ken chemotherapy a miembro iti Pantawid Pamilyang Pilipino Program ken adda dagiti gundaway nga agkasapulan da ti dara.
Inbatad na a babaen iti nasao nga aktibidad ket adda ti alisto a pangalaan dagiti miembro ti programa
Inpakaammo na a dagiti successful blood donors ket naipaayan ti grocery item.
Innayon ni Martin a daytoyen ti maikadwa a gundaway nga iyuswat da ti nasao nga aktibidad, ken napagtutulagan da nga itultuloy da daytoyen tapno masigurado nga adda ti nakasagana a dara a maipaay para kadagiti miembro ti Pantawid Pamilyang Pilipino Program nga agkasapulan ditoy ciudad ti Laoag.
