LAOAG CITY – Natiliw ti lima a babbai ken maysa a lalaki kalpasan a naaktwan dagiti kameng ti Philippine National Police (PNP) nga agsusugal da iti Sitio Sagsagat, Barangay Caraitan iti ili ti Badoc.
Daytoy ti kinumpirmaran ni Police Major Joseph Tayaban, ti chief of police iti nasao nga ili.
Inbaga ni Tayaban nga adda ti naawat da a report mainaig iti kaadda dagiti agsusugal iti lugar ken iti panagresponde da ket ditoy a naaktwan da dagiti suspek nga agay-ayam ti tong-its.
Kuna na a nakumpiskar da iti lugar ti 2 set ti baraha ken pusta dagiti suspek a kwarta nga umabot iti P13,908.00
Inpakaammo pay ni Tayaban a dua kadagiti suspek ket miembro ti 4Ps iti nasao nga ili.
Segun ken ni Tayaban, ipila da ita nga aldaw babaen iti inquest ti reklamo a panaglabsing iti Presidential Decree (PD) 1602 wenno Illegal Gambling.
