LAOAG CITY – Inbatad ni Police Major Joseph Tayaban, ti chief of police iti ili ti Badoc nga adda ti natiliw da a lima nga indibidual a naggandat a sumrek ditoy probinsya.
Inlawlawag ni Tayaban a dagiti suspek ket merchandisers ken aaggapo da iti San Fernando La Union ken agturong da koma ditoy ciudad ti Laoag a nakalugan ti delivery van.
Inbaga na a kabayatan ti panangsada da ti delivery van ket nadlaw dagiti kakadwa na nga arigna adda ti tao iti likud ti van.
Gapu iti daytoy ket ininspeksyon da iti likud ti van ket ditoy a nakita da ti tallo a kakadwa dagiti dua a nakapwesto iti sango ti van.
Inbatad na a dagiti dua nga adda iti sango ti van ket kompleto ti dokumento da karaman ti antigen test result idinto a dagiti tallo a naglemmeng iti likud ket awan ti dokumento da.
Naipadalan dagiti tallo a suspek iti antigen test ket negatibo met ti resulta na.
Inpakaammo ni Tayaban a gapu iti inaramid dagiti suspek ket kasoan da ida ti panaglabsing iti Article 151 ti Revised Penal Code babaen iti inquest.
Iti agdama ket nagtalinaed dagiti suspek iti kustdodyar ti PNP iti ili ti Badoc.
