LAOAG CITY – Naipilan babaen iti inquest ti kaso a syndicated estafa kontra kadagiti lima a suspek a maipagarop a miembro ti Bagong Bansang Maharlika International Incorporated (BBMIC) a napan nagdawdawat ti kwarta kadagiti residente iti Barangay Gaang iti ili ti Currimao.
Daytoy ti inbatad ni Police Major Ma. Aurora Cruz, ti chief of police iti ili ti Currimao.
Inlawlawag ni Cruz nga iti panagimbestigar da babaen ti tulong iti Ilocos Norte Police Provincial Office (INPPO) ket naduktalan da a rumrumuar nga adda ti lider ti grupo iti national.
Naamoan da pay nga adon dagiti lugar a nagturturongan ti nasao a grupo.
Inpakaammo ni Cruz nga iti agdama ket nagtalinaed iti kustodyar da dagiti suspek.
Maipalagip a natiliw dagiti suspek kalpasan a nagreklamo dagiti residente gapu iti maipagarop a panagdawdawat da kadakuada ti kwarta.
