LAOAG CITY – Naidungpar ti maysa a pick-up a lugan iti sakupen ti Brgy. 19, San Lorenzo iti ili a San Nicolas.
Nabigbig ti driver ti Mitsubishi Strada a ni Mac Abigail Sevilla, agtawen ti 38, naasawaan, maysa a seaman, awanan lisensya idinto a dagiti kadwana ket da Mark Angelus Deuz, agtawen ti 21, awanan asawa, awanan trabaho, Romulo Deuz, agtawen ti 45, naasawaan, maysa a Chief Tanod, Nolie Deuz, agtawen ti 30, awanan asawa, maysa a mannalon ken ni Warlito Deuz, agtawen ti 29, awanan asawa, maysa a construction worker ken agpapada dagitoy a residente iti Brgy. 18 iti nadakamat nga ili.
Basar iti imbestigasyon, bayat a dumaldalyasatda nga agpaabagatan iti Manila North Road ket dita a naawanan da ti kontrol a nangitunda iti panagbalbaliktad iti nasao a lugan.
Nagsagaba dagiti biktima iti sugat iti nagduduma a paset ti bagida rason a dagus da a naitaray iti Mariano Marcos Memorial Hospital and Medical Center.
Mapapati nga addaan ti impluwensiya ti arak ti driver.
