LAOAG CITY – Lima a tattao ti natay a pakairamanan ti tallo a lallaki, maysa a babai ken ti ubing nga agtawen ti pito kalpasan a naarinebneb ti nagluganan da a bangka bayat ti ibaballasiw da iti baybay manipod iti France agturong da koma iti Britanya.
Inbatad ti French coastguard a ti bassit a bangka ket overloaded gapu ta umabot iti 110 a tattao ti nakalugan idi napasamak ti insidente.
Napasamak ti insidente, sumagmamano laeng nga oras kalpasan nga inpasa ti parliament iti United Kingdom ti Rwanda Bill a gagem na a mapawilan dagiti babassit a bangka nga aglayag nga agturong iti sabali a pagilian.
Mainaig iti daytoy, inawagan ni Home Secretary James Cleverly ti napasamak kas nakaam-ames a trahedya ken inpasingked na nga ar-aramiden amin ti gobierno tapno saanen a maulit ti insidente.
