LAOAG CITY – Natay ti lima nga indibidual gapu iti suicide bombing idiay Pakistan.
Daytoy ket kalpasan nga immatake ti dua a suicide bombers ti headquarters ti Pakistani paramilitary force.
Karaman kadagiti pimmusay ket ti tallo a security officials ken adda ti 12 a tattao ti nasugatan gapu iti insidente.
Basar kadagiti otoridad, dagiti suspek ket armado kalpasan a nakasoanda iti Federal Constabulary’s headquarters iti Peshawar iti north-western Pakistan.
Awan met ti grupo a mangakklon ti responsibilidad iti nasao a panangatake.
Masarakan ti complex ti constabulary iti naiget a seguridad a lugar iti Peshawar ken dagiti rumaut ket kasapulanda a sumango pay laeng ti adu a tukad ti seguridad tapno makastrek.
Segun kadagiti nakakita iti napasamak ket adda ti nangngegda a dua a napigsa a panagbettak kabayatan iti kaaddada iti lugar.
Mainaig iti daytoy, adda ti lima a security officials ken pito a sibilian ti nasugatan.
Indiskribir dagiti Pakistan authorities ti panangatake kas “foiled terrorist plot” no sadinno a pinaputukan dagiti otoridad dagiti suspek iti gate sakbay pay a nakastrek dagitoy iti pasdek.
Inbatad ni Prime Minister Shehbaz Sharif idiay Pakistan a masapul a mabigbig nga insigida dagiti adda iti likudan ti insidente ken sumango iti maiyannatop a pannusa.
Kabayatanna, ti Pakistani Taliban nga am-ammo pay iti awag a Tehreek-i-Taliban Pakistan ket aktibo iti probinsia ken inakklonda ti responsibilidad para kadagiti kapada a panangatake iti intero a pagilian.
