LAOAG CITY – Balligi a naarestar dagiti lima nga indibidual gapu iti panagsusugal iti maysa a minatayan iti Brgy. 20, San Pablo iti ili ti San Nicolas.
Segun ken ni P/Capt. Randy Damo, Hepe ti San Nicolas Municipal Police Station, nabigbig dagiti suspek nga agtawen iti 33, residente ti Brgy. 20, San Pablo iti ili ti San Nicolas, agtawen iti 66, residente ti Brgy. 28 ditoy siudad ti Laoag, agtawen iti 50, agtawen iti 54, agtawen iti 55 nga agpapada a residente ti Brgy. San Agustin iti ili ti San Nicolas.
Inbatadna a natiliw dagiti nasao a suspek babaen iti naiwayat nga Anti-Illegal Gambling Operation no sadinno a naaktuaranda nga agsusugal dagitoy ti Lucky 9.
Gapu iti daytoy, kunana a kinumpiskarda dagiti baraha, tugaw ken ti 12,685 a pisos a mapapati a nausar kas pusta iti panagsusugal dagitoy.
Innayonna a manamnama a sumango dagiti lima a suspek iti kaso gapu iti panaglabsingda iti Presidential Decree (PD) 1602 wenno Anti Gambling Law.
