LAOAG CITY – Pinaneknekan ti five-time champion a Brazil ti kinalaingda iti football field kalpasan nga inabakna ti Scotland iti ay-ayam iti score a 3-0.
Ti panangabak ti Brazil ket nagbalin a wagas tapno maalada ti kangatoan a puesto iti Group C.
Pito a minuto pay laeng iti umuna a paset ti ay-ayam ket insigida a nagpakita iti kinalaing ti pambato ti Real Madrid a ni Vinícius Júnior kalpasan a ginundawayanna ti panagbiddot ti depensa ti Scotland tapno mairekord ti umuna a goal iti score a 1-0.
Sakbay a nalpas ti first-half stoppage time, naka-score manen ni Vini Jr. para iti brace-na isut gapuna nga immadayo pay ti lamang ti South American powerhouse iti score a 2-0.
Iti panagserrek ti maika-60 a minuto iti maikadua a paset, naan-anayen nga inabak ti Brazil ti Tartan Army idi inserrek ni Matheus Cunha ti maikatlo a goal ti laban iti tulong ti maysa nga assist manipud iti kabinnalubal a koponan.
Naammoan a gapu iti panagballigi, nakastreken ti Brazil iti Round of 32 kas Group C leader.
Kabayatanna, iggem ti Scotland ti 3 a puntos ken agur-uray no makastrek kas maysa kadagiti best third-placed teams iti agtultuloy a FIFA World Cup.
