LAOAG CITY – Ad-adalen ti Philippine National Police ti pannakaipatungpal ti 5-year promotion ban kadagiti pulis a karaman iti aniaman a klase ti krimen.
Segun ken ni Philippine National Police Public Information Office Chief, Police Col. Jean Fajardo, posible a makatulong ti ban tapno maliklikan dagiti pulis a nagaramid ti aniaman nga iligal.
Iti babaen ti Republic Act No. 9708, saan a mabalin a ma-promote ti maysa a pulis no adda ti sangsangoenna a kaso ken maad-adal daytoy iti uneg ti dua a tawen.
Naammoan a no bilang maaprobaran ti baro a pagannurutan, manayunan ti tallo a tawen ti panagrigat dagiti maseknan a pulis sakbay a makaala ti promosion gapu ta kasapulan pay laeng nga umuna a masolbarda ti kaso a sangsangoenda.
Nupay kasta, no ti maysa a pulos ket na-promote ngem sinentensiaan ti korte gapu iti inaramidna, mabalin daytoy nga ibabawi ken manayunan pay dagiti maiyannatop a pannusa kontra kenkuana.
Maipalagip nga iti kallabes ket adda dagiti sumagmamano a pulis ti nairaman kadagiti nagduduma a kaso.
