LAOAG CITY – Nailungalong iti Senado ti maysa a gakat a mangkissay agingga iti 50 a porsiyento iti remittance fees dagiti overseas Filipino workers (OFWs), iti baet ti agtultuloy a reklamo minaig iti nangato a singir ken dadduma pay a mabayadan iti panagipatulod ti kwarta ditoy Pilipinas.
Nagpila ni Senador Jinggoy Ejercito Estrada ti Senate Bill No. 1074 a gagem na a direkta a makissayan ti magastos dagiti Overseas Filipino Workers iti panagipatulod ti mapastrek da iti pamilya da.
Naipalaon iti gakat a maobligar dagiti bangko ken remittance centers a mangipatungpal ti kagudwa a diskwento iti remittance fees, kasukat ti panangipalubos ti panag-claim ti tax deductions para iti operational costs da.
Gagem ti gakat a masigurado a dakdakkel a paset ti mapaspastrek dagiti Overseas Filipino Workers ti maikabil iti bukod da a pamilya, imbes a maibayad da amin.
Basar iti datos, immabot iti record-high a 38.34 bilyon a dolyar ti remittances ti OFWs idi 2024, tallo a porsiento a nangatngato no ikompara idi 2023 a katukad ti 8.3% ti gross domestic product ken 7.4% ti gross national income ti pagilian.
Adda ti katukad a pannusa dagiti aglabsing, karaman ti pannakabalud agingga iti innem a tawen ken multa a manipod P500 a ribo a pisos agingga iti P750,000, malaksid kadagiti dadduma pay a pannusa iti babaen ti maipatpatungpal a linteg iti panagibangko.
Mapatawan pay ti pannusa dagiti institusyon nga agkedked a mangawat ti remittances manipod kadagiti OFWs.
