LAOAG CITY – Kinumpirmaran ni Brgy. Chairman Hector Cristobal iti Brgy. 62-B Navotas South ditoy siudad ti Laoag a 50 a pamilya dagiti benepisyaryo ti core shelter assistance program.
Kuna a ti nasao a programa ket nagbinnuligan ti lokal a gobierno ditoy siudad ken ti Department of Social Welfare and Development (DSWD).
Inbatadna a naan-anayen a naiyawat ti pagtaengan dagiti 50 a pamilya nga isuda ti nakaro a naapektaran ti bagyo Lando idi tawen 2015.
Mainaig iti daytoy, inlawlawag na a 160,000 a pisos ti inyalokar ti DSWD iti kada pagtaengan idinto a ti lokal a gobierno ditoy siudad ti nangibaklay ti lote a nagdissoan dagitoy.
