LAOAG CITY – Inpakaamo ni Dr. Jake Rubio, Urologist ken presidente ti Ilocos Norte Medical Society a 50 a private doctors a miembro iti nasao a gunglo dagiti nabakunaan kontra ti covid-19 ita nga aldaw.
Segun ken ni Rubio, 18 a doktor ti nabakunaan iti Mariano Marcos Memorial Hospital and Medical Center iti siudad ti Batac ken 10 a doktor iti Laoag City General Hospital ditoy siudad babaen ti astrazeneca vaccine idinto a dagiti dadduma ket nakaawat ti sinovac vaccine.
Inlawlawag ni Rubio a dagiti doktor a nabakunaan ket awanan ti affiliation kadagiti nasao nga ospital.
Mainaig iti daytoy, kuna na a nu aniaman a bakuna ti naawat iti umuna a dose ket masapol a daytoy met ti maibakuna iti maikdua a dose.
Immunan nga inbunannag ni Rubio nga awan ti nakita da nga adverse effect ti bakuna malaksid iti sangkabasit a panagngato ti blood pressure dagiti dadduma a doktor.
Gutgutiguten ni Rubio ti publiko asaan nga agamak iti bakuna gapu ta natalged daytoy.
