LAOAG CITY – Kinumpirmaran ni Police Supt. Marlon Paiste, ti chief of police iti ciudad ti Batac ti panangiyuswat da ti search warrant operation iti Barangay Quiling Sur ti nasao a ciudad.
Binigbig na ti subject ti operasyon a ni Teodoro Malate, maysa a dentista ken residente met laeng ti nasao a barangay.
Inbatad ni Paiste a ti search warrant ket inparuk-at ni Hon. Judge Francisco Quilala, presiding judge iti RTC Branch 14 ditoy ciudad ti Laoag.
Inlawlawag na a ti nakailanad ti search warrant ket maysa a short firearm ngem awan ti naala da a paltog ti balay ni Malate no di ket nakakumpiskar da ti maysa a kahon nga addaan ti 50 a bala ti caliber 22 a paltog.
Segun ken ni Paiste, inyaplikaran da ti search warrant ni Malate kalpasan a nagpositibo ti panag-validate da nga adda ti ik-ikutan na a paltog.
Innayon na a segun ti naidandanun kadakuada nga impormasyon, ipakpakita ni Malate ti paltog na no nabara ti ulo na.
