LAOAG CITY – Kinumpirmaran da Dr. Elizer Asuncion, chief of hospital ti Laoag City General Hospital (LCGH) ken Mr. Francis Tungpalan iti records station a tawen 2016 idi naudi a nangted ti GLEDCO ti 50 % share da iti ospital partikular ti summary income sharing.
Basar iti dokumento, nakalanad a Nobyembre 2016 ti naudi a panangted ti GLEDCO ti bingay da iti nasao nga ospital manipud iti mapaspasatrek da iti binulan.
Segun ti report, umabot ti 2,013,053.96 a pisos ti kadagupan ti naited ti kooperatiba iti ospital kalpasan ket awanen ti naawat ti LCGH.
Naamoan pay nga iti MOA a nagpinnirmaan ti LCGH ken GLEDCO ket awan ti nakailanad no pagpatinggaan ti panangted ti kooperatiba ti 50% share da iti ospital.
Mainaig iti daytoy, inlawlawag ni Mr. Edgar Pascual, chairman ti GLEDCO a daytoy ket gapo ta linapdan ti COA isuda nga agsuplay ti agas iti nakadamat nga ospital ken sipud iti daytoy ket awan pay ti nagsaritaan ti kooperatiba ken ti LCGH.
Kabayatanna, umabot ti 3.6 milyon a pisos ti nausar ti GLEDCO para iti pannakatarimaan ti parmasya ken groserya isut gapo na a dagiti agup-upa iti pasdek ket agbaybayad da iti nasao a kooperatiba.
