LAOAG CITY – Umabot iti 52 a pawikan ti inbulos dagiti kameng ti Municipal Agriculture Office iti kabaybayan a paset ti Brgy. Calioet-Libong iti ili ti Bacarra.
Inbatad ni Mr. William Ulep, ti municipal agriculturist iti nasao nga ili a sakbay daytoy ket nabanbantayan dagiti itlog ti pawikan.
Kuna na a nabarikadaan pay ti nakaipanan dagiti itlog iti igid ti baybay agingga a nagpessa dagitoy tapno saan a madalapos dagiti agpasyar wenno mapan agdigos iti lugar.
Immunan nga inpakaamo ti municipal agriculturist nga immabot ti 52 nga aldaw ti napalabas sakbay a nagpessa dagiti itlog ti pawikan.
Mainaig iti daytoy, kuna ni Ulep a saan a daytoy ti umuna a daras nga adda ti pawikan a nagitlog iti nasao a lugar.
