LAOAG CITY – Pinalubusan ti International Criminal Court (ICC) ti 539 nga indibidual a maipagarop a biktima ti kampanya kontra droga ti administrasyon ni dati a Presidente Rodrigo Duterte a makipaset kadagiti panagdengngeg mainaig iti kaso a crimes against humanity kontra iti dati a presidente.
Iti inparuk-at a Q&A ti ICC, inbatad ti korte a dagiti makipartisipar ket pakairamanan dagiti pamilya dagiti natay iti anti-drug campaign.
Dinutukan met ti korte da Joel Butuyan ken Gilbert Andres, karaman ni Paolina Massidda, tapno agserbi a maymaysa a grupo ti legal a mangibagi kadagiti biktima.
Immuna iti daytoy, kinumpirmaran ti Pre-Trial Chamber ti ICC ti tallo a charges kontra ken niDuterte nga adda ti pakainaigan dagiti pammapatay idi daytoy ti mayor ti Davao City ken nagbalin a presidente ti Pilipinas.
Manamnama a sumango ni Duterte iti trial kas maiyataday iti Article 63 ti Rome Statute, a mangibilbilin a masapol nga adda ti akusado iti trial.
