LAOAG CITY – Inrakurak ti Malacañang a nangiparuk-at ti show cause order ti Department of Energy (DOE) kontra iti 54 a gasolinaan a maipagarup a nangipangato ti presio ti gasolina a saan a maiyataday iti panawagan ti gobierno.
Inbatad ni Palace Press Officer Claire Castro nga im-imbestigaran itan no naglabsing dagiti gasolinaan iti pammilin ti gobierno a liklikan ti saan a nainkalintegan a panagngato ti presio ti langis iti baet ti tension idiay Middle East.
Inlawlawagna a no mapaneknekan nga adda ti fraudulent acts wenno iligal nga aramid dagiti gasolinaan, mabalin a makanselar ti permit-da para iti operasionda.
Kabayatanna, mainaig iti fuel subsidy para kadagiti sektor a maapektaran ti posible a panagngato ti presio ti langis, kunana a mangipaay ti agsina a detalye ti Department of Energy.
Immunan a nagballaag ti Palasyo kadagiti gasolinaan a saan nga agipangato ti presio nga awan ti umdas a pangibasaran nangruna ket kumarkaro ti riribok idiay Middle East a mabalin a makaapektar iti global oil prices.
