LAOAG CITY – Addan ti 54% ti ili ti Solsona ti apektado iti panagngato ti kaso ti covid-19.
Daytoy ti kinumpirmaran ni Major Roxanne Parado, ti mangidadaulo ti Emergency Operation Center for Covid-19 Contact Tracing.
Inbatad ni Parado a manipod iti 22 a barangay iti nasao nga ili, 12 dagiti naapektaran ti covid-19.
Mainaig iti daytoy, kuna na a naisayangkat ti surveillance iti Brgy. Capurictan, Brgy. Bubuos, Brgy. Laureta ken Brgy. Darasdas nu sadino a dumalan iti tetsing ti maysa a representative iti kada pamilya.
Kabayatanna, inpakaammo ni Parado a basar iti guidlines ti IATF, masapol a mailockdown ti maysa nga ili nu dumanon iti 25% ti maapektaran ti covid-19.
Inbunannag na nga addan ti pannakairekomendar ti lockdown kenni Solsona Mayor Joseph de Lara ngem granular lockdown pay laeng ti naipatungpal.
Iti agdama ket addan nasurok 60 ti aktibo a kaso ti covid-19 iti ili ti Solsona idinto a maysa ti pimmusay.
