LAOAG CITY – Balligi a naisayangkat ti 57th Founding Anniversary ti Mariano Marcos Memorial Hospital and Medical Center iti siudad ti Batac.
Segun ken ni Dr. Modesty Leano, mangidadaulo ti Department of Pathology and Laboratories iti nasao nga ospital, daytoy a tawen ket addaanda ti tema a “Rooted in Compassion, Growing in Excellence, Resonating in Community.”
Inbatadna a kanayonda latta ipangpangruna ti kasapulan dagiti pasiente a matamtaming tapno maipasigurado ti pannakaipadanon ti serbisio medikal kadakuada.
Inlawlawagna a maysa kadagiti kangrunaan a nagatendar iti nasao nga aktibidad ket dagiti senior citizens ken dagiti pasiente a natulungan ti ospital a nagimbag manipud kadagiti sinagabada a sakit.
Kunana nga agtultuloy ti panangitandudoda kadagiti adbokasia iti benneg ti salun-at tapno maipakaammo kadagiti umili dagiti rumbeng nga aramidenda tapno mataripato a nasayaat ti salun-at.
Kabayatanna, naammoan a kageddan ti panangrambak ti 57th Founding Anniversary ti Mariano Marcos Memorial Hospital and Medical Center iti siudad ti Batac ket adda pay ti maisayangkat a Timpuyog Patient Summit Exhibit ken Trade Fair.
